Showing posts with label News Other. Show all posts
Showing posts with label News Other. Show all posts

Friday, 31 January 2014

30 സെക്കന്‍ഡ് പരസ്യത്തിന് 25 കോടി !!!

അമേരിക്കയില്‍ ഞായറാഴ്ച നടക്കുന്ന സൂപ്പര്‍ ബോള്‍ ഫുട്‌ബോള്‍ മല്‍സരത്തിനുള്ള ടെലിവിഷന്‍ പരസ്യ നിരക്ക് ലോകത്ത് നിലിവിലുള്ള എല്ലാ റെക്കോഡുകളേയും മറികടന്നു. 30 സെക്കന്‍ഡ് പരസ്യം കാണിക്കാനുള്ള നിരക്ക് 24 കോടി 80 ലക്ഷം രൂപയാണ് ഇത്തവണ ഈടാക്കുന്നത്.
അമേരിക്കയില്‍ ഏറ്റവും കൂടുതല്‍ ജനങ്ങള്‍ കാണുന്ന ഫുട്‌ബോള്‍ മല്‍സരമായ സൂപ്പര്‍ബോളിന്റെ ഇടവേളയില്‍ പരസ്യം ചെയ്യാന്‍ ഓരോ സെക്കന്‍ഡിനും ഒരു കോടിയോളം രൂപ കൊടുക്കണം. ആകെ മൂന്നു മണിക്കൂര്‍ മാത്രം നീണ്ടു നില്‍ക്കുന്ന മല്‍സരത്തിനായി മാത്രം കോടികള്‍ മുടക്കി പുതുമയുള്ള പരസ്യങ്ങളാണ് വന്‍കിട കമ്പനികള്‍ ഒരുക്കിയിരിക്കുന്നത്.
ജാഗ്വാര്‍ എന്ന വാഹന വമ്പന്റെ പരസ്യം സംവിധാനം ചെയ്തിരിക്കുന്നത് ഓസ്‌കര്‍ ജേതാവ് ടോം ഹോപ്പറാണ്. അഭിനയിക്കുന്നത് ബെന്‍ കിങ്‌സ് ലിയും.
ഓഡി, ജനറല്‍ മോട്ടോഴ്‌സ്, വോക്‌സ് വാഗന്‍, ഹ്യുണ്ടായി എന്നിവയെല്ലാം പുതിയ പരസ്യങ്ങള്‍ സൂപ്പര്‍ബോള്‍ ഇടവേളയില്‍ അവതരിപ്പിക്കും. താങ്ക്‌സ് ഗിവിങ് ഡേ അഥവാ കൃതജ്ഞതാ ദിവസത്തിനു ശേഷം അമേരിക്കയില്‍ ഏറ്റവും കൂടുതല്‍ പണം ചെലവഴിക്കപ്പെടുന്ന ദിവസം കൂടിയാണ് സൂപ്പര്‍ബോള്‍ ഞായര്‍.
അമേരിക്കയിലെ നാഷനല്‍ ഫുട്‌ബോള്‍ ലീഗിലും അമേരിക്കന്‍ ഫുട്‌ബോള്‍ ലീഗിലും ഒന്നാമതത്തെത്തുന്ന ടീമുകള്‍ തമ്മില്‍ ഏറ്റുമുട്ടുന്ന സൂപ്പര്‍ ബോള്‍ മല്‍സരം കഴിഞ്ഞവര്‍ഷം 10 കോടി 80 ലക്ഷം ആളുകളാണ് ടെലിവിഷനിലൂടെ കണ്ടത്. 2012 ല്‍ 11 കോടി 10 ലക്ഷം ആളുകളും കണ്ടു എന്നാണ് കണക്ക്.


Wednesday, 29 January 2014

കമ്പ്യൂട്ടര്‍ ആപ്ലിക്കേഷനുകള്‍ സ്ത്രീജീവിതത്തെ എങ്ങനെ സ്വാധീനിക്കുന്നു? - സി ഷാര്‍പ്പ് സി ബ്ലന്റ്

അന്താരാഷ്ട്ര നാടകോത്സവത്തില്‍ കര്‍ണാടിക് സംഗീതജ്ഞ എം ഡി പല്ലവി അവതരിപ്പിച്ച ഏകാംഗനാടകം സി ഷാര്‍പ്പ് സി ബ്ലന്റ്  പ്രേക്ഷക ശ്രദ്ധ നേടി. പുതിയ കമ്പ്യൂട്ടര്‍ ആപ്ലിക്കേഷനുകള്‍ സ്ത്രീകളുടെ ജീവിതത്തെ എങ്ങനെ സ്വാധീനിക്കുന്നുവെന്ന് കാട്ടുന്ന നാടകം ജര്‍മ്മന്‍ നാടക പ്രവര്‍ത്തക സോഫിയ സ്റ്റെഫ് ആണ് സംവിധാനം ചെയ്തത്.

പാട്ടുപാടുന്ന കമ്പ്യൂട്ടര്‍ ആപ്ലിക്കേഷന്റെ പേരാണ് ശില്‍പ 202. ഉപഭോക്താവിന്റെ ഇഷ്ടങ്ങള്‍ക്കനുസരിച്ച് പ്രവര്‍ത്തിക്കുന്നു ശില്‍പയുടെ ഡെമോ അവതരണത്തിലൂടെയാണ
നാടകം തുടങ്ങുന്നത്.

സംഗീതജ്ഞ കൂടിയായ എം ഡി പല്ലവി മുഖ്യവേഷത്തിലെത്തിയ നാടകം ചര്‍ച്ച ചെയ്യുന്നത് സാങ്കേതിക വിദ്യയുടെ ലോകത്ത് ചോദ്യം ചെയ്യപ്പെടുന്ന സ്ത്രീത്വത്തെയാണ്.
ഉറക്കെ സംസാരിക്കാന്‍ പാടില്ലാത്ത, മുടിമുറിച്ചതിനെ  ചോദ്യം ചെയ്യുന്ന സമൂഹത്തെ ശില്‍പ്പ എന്ന കമ്പ്യൂട്ടര്‍ ആപ്ലിക്കേഷന്‍ വെല്ലുവിളിക്കുന്നു. 

Tuesday, 28 January 2014

പ്ലാസ്റ്റിക്കില്‍നിന്ന് ഇന്ധനമുണ്ടാക്കി ഇന്ത്യന്‍ ഗവേഷകര്‍

വാഷിങ്ടണ്‍ : ഉപയോഗശൂന്യമായ പ്ലാസ്റ്റിക്ക് സഞ്ചികളില്‍നിന്നും മാലിന്യങ്ങളില്‍നിന്നും വാഹന ഇന്ധനമുണ്ടാക്കുന്നതിനുള്ള നൂതനമാര്‍ഗം ഇന്ത്യന്‍ ശാസ്ത്രജ്ഞര്‍ വികസിപ്പിച്ചതായി വാര്‍ത്ത. ഒഡിഷ സെഞ്ചൂറിയന്‍ യൂണിവേഴ്‌സിറ്റി ഓഫ് ടെക്‌നോളജിയിലെ കെമിസ്റ്റ് അച്യുത്കുമാര്‍ പാണ്ടയും ഒഡിഷ എന്‍.ഐ.ടി. കെമിക്കല്‍ എന്‍ജിനീയര്‍ രഘുബന്‍ഷ് കുമാര്‍ സിങ്ങുമാണ് കുറഞ്ഞതാപനിലമാത്രം ആവശ്യമായ സാങ്കേതികവിദ്യ വികസിപ്പിച്ചത്.

പ്ലാസ്റ്റിക്ക് മാലിന്യങ്ങള്‍ രാസത്വരകത്തിന്റെ സാന്നിധ്യത്തില്‍ 400-മുതല്‍ 500-ഡിഗ്രി താപനിലയില്‍ ചൂടാക്കിയാണ് ദ്രാവകരൂപത്തിലുള്ള ഇന്ധനം തയ്യാറാക്കുന്നത്. ഒരു കിലോഗ്രാം പ്ലാസ്റ്റിക്കില്‍നിന്ന് 700-ഗ്രാം ഇന്ധനമുണ്ടാക്കാന്‍ കഴിയുമെന്ന് ഗവേഷകര്‍ അവകാശപ്പെടുന്നു. വാതകങ്ങളും മെഴുകുമാണ് ഉപോത്പന്നങ്ങള്‍. ഇന്‍റര്‍നാഷണല്‍ ജേണല്‍ ഓഫ് എന്‍വിറോണ്‍മെന്‍റ് ആന്‍ഡ് വേസ്റ്റ് മാനേജ്‌മെന്‍റിലാണ് പാണ്ടയുടേയും രഘുബന്‍ഷിന്‍േറയും ഗവേഷണവിവരങ്ങള്‍ പ്രസിദ്ധീകരിച്ചിട്ടുള്ളത്.

പദ്ധതിവിജയിച്ചാല്‍ പ്ലാസ്റ്റിക്ക് മാലിന്യംമൂലം ലോകമെമ്പാടുമുണ്ടാവുന്ന ഗുരുതര പരിസ്ഥിതിമലിനീകരണങ്ങള്‍ തടയാനാവും.

Sunday, 26 January 2014

റിപ്പബ്ലിക് ദിനം ആഘോഷിച്ച് ഗൂഗിളും


ലോകത്തിലെ ഏറ്റവും വലിയ ഇന്‍റര്‍നെറ്റ് സെര്‍ച്ച് എഞ്ചിനായ ഗൂഗിളും റിപ്പബ്ലിക് ദിനം ആഘോഷിക്കുന്നു. ഗൂഗിള്‍ ഹോം പേജില്‍ ഗൂഗിള്‍ ഡൂഡില്‍സ് നല്‍കിയാണ് ഗൂഗിളും ആഘോഷത്തില്‍ പങ്കുചേരുന്നത്. സായുധ സേനാംഗങ്ങള്‍ മോട്ടോര്‍ ബൈക്കില്‍ സഞ്ചരിക്കുന്ന ചിത്രമാണ് ഡൂഡില്‍സിലുള്ളത്. ഇന്ത്യന്‍ ദേശീയപതാകയുടെ നിറങ്ങള്‍ ചാലിച്ച് ചിത്രം രൂപപ്പെടുത്തിയിരിക്കുന്നു. ഡൂഡില്‍സില്‍ ക്ലിക്ക് ചെയ്താല്‍ റിപ്പബ്ലിക്ദിനത്തെക്കുറിച്ചുള്ള വിശദമായ വിവരണങ്ങളും ലഭ്യമാകും

Saturday, 25 January 2014

പ്രണയത്തിന് ശബ്ദമെന്തിന്?

ജന്‍മനാ ബധിരയാണ് അവള്‍. മൌനം കൊണ്ട് സംസാരിക്കുന്നവള്‍. ഇത്തവണത്തെ പിറന്നാളിന് അവള്‍ക്ക് ലഭിച്ചത് ഒരു മൊബൈല്‍ ഫോണാണ്. കേള്‍ക്കാനും പറയാനും കഴിയാത്തവള്‍ക്ക് ഈ ഫോണ്‍ എന്തിന് എന്ന ചിന്തയില്‍ അവളുടെ പുരികം ചുളിഞ്ഞു.

ഇത്തിരി കഴിഞ്ഞപ്പോള്‍ ഫോണില്‍ വെളിച്ചം വന്നു മിന്നി. കോളാണ്. അപ്പുറത്ത് അവളുടെ ഉറ്റ കൂട്ടുകാരനാണ്, റാം. അവനും ബധിരന്‍. വീഡിയോ കോളിലൂടെ അവളവനെ കാണുന്നു. പിറന്നാള്‍ ആശംസ നേര്‍ന്ന ശേഷം അവനവളോട് ആംഗ്യ ഭാഷയില്‍ വിവാഹാഭ്യര്‍ത്ഥന നടത്തുന്നു. അതിനെന്തായിരിക്കും അവളുടെ മറുപടി?

ഇത് സ്പീച്ച് ലെസ് എന്ന ഹ്രസ്വസിനിമ. സംവിധാനം, തിരക്കഥ, എഡിറ്റിങ്: ശ്രീകാന്ത് കെകരെ. ലോകമെങ്ങുമുള്ള ചലച്ചിത്ര പ്രവര്‍ത്തകര്‍ക്കായി നടന്ന 48 മണിക്കൂര്‍ ഫിലിം പ്രൊജക്റ്റ് മല്‍സരത്തിന് സമര്‍പ്പിച്ചതാണ്, രണ്ടു ദിവസം കൊണ്ട് ചിത്രീകരിച്ച ഈ അഞ്ചു മിനിറ്റ് സിനിമ. മുംബൈയില്‍ നടന്ന മല്‍സരത്തില്‍ മികച്ച സംവിധായകന്‍, മികച്ച നടന്‍, മികച്ച നടി, മികച്ച ഒറിജനല്‍ മ്യൂസിക്, മികച്ച രണ്ടാമത്തെ ചിത്രം എന്നിങ്ങനെ അഞ്ച് അവാര്‍ഡുകള്‍ ഈ ചിത്രം കരസ്ഥമാക്കി.

കാണുക, ആരും നിശ്ശബ്ദരായി പോവുന്ന പ്രണയത്തിന്റെ ഇന്ദ്രജാലം: 


മേക്കപ്പ് ചെയ്യുമ്പോള്‍ ശ്രദ്ധിക്കേണ്ട കാര്യങ്ങള്‍

രമ്യ ആര്‍

ആരോഗ്യമുള്ള ശരീരത്തില്‍ മാത്രമേ സൌന്ദര്യം നിലനില്‍ക്കുകയുള്ളൂ. ഒരാളുടെ സൌന്ദര്യം എന്നു പറയുന്നത് മുഖ സൌന്ദര്യം മാത്രമല്ല വ്യക്തിത്വം കൂടെയാണ് വ്യക്തമാക്കുന്നത്. മുന്‍പ് മേക്കപ്പ് എന്ന് കേള്‍ക്കുമ്പള്‍ ആദ്യം സ്ത്രീകളെ സംബന്ധിക്കുന്നത് മാത്രമായിരുന്നു, എന്നാല്‍ ഇന്ന് പുരുഷന്‍മാരും സ്ത്രീകളും ഒരുപോലെ മേക്കപ്പിന് പ്രാധാന്യം കല്‍പിക്കുന്നു. മേക്കപ്പ് ചെയ്യുന്നതിനുമുന്‍പ് അറിയേണ്ട പ്രധാന കാര്യങ്ങള്‍ ഇതാ

മേക്കപ്പ് ഒരേസമയം ലളിതവും ആകര്‍ഷണീയവും ആകണം. ഓവര്‍മേക്കപ്പ് ആയി ഒരിക്കലും തോന്നരുത്. മേക്കപ്പ് എല്ലായ്പ്പോഴും അതാത് സാഹചര്യങ്ങള്‍ക്ക് അനുസരിച്ചായിരിക്കണം. പാര്‍ട്ടികള്‍, വിവാഹ പാര്‍ട്ടികള്‍, ഔദ്യോഗിക സ്ഥലം എന്നിങ്ങനെ ഓരോ ഇടത്തും അനുയോജ്യമായ മേക്കപ്പ് ഉപയോഗിക്കുന്നതാണ് നല്ലത്.


മുഖസംരക്ഷണത്തിന് എസ് പി എഫ് 
എസ് പി എഫ് അഥവാ സണ്‍ പ്രൊട്ടഷന്‍ ഫാക്റ്റര്‍ നമ്മുടെ ചര്‍മ്മത്തെ അള്‍ട്രാ വയലറ്റ് രശ്മികളില്‍ നിന്ന് സംരക്ഷിക്കുന്നു. ഇതില്‍ അടങ്ങിയിരിക്കുന്ന ടെറ്റാനിയം ഡൈഓക്സൈഡ്, സിങ്ക് ഓക്സൈഡ് എന്നിവ സൂര്യപ്രകാശത്തില്‍ നിന്ന് വരുന്ന മാരകമായ അള്‍ട്രാവൈലറ്റ് രശ്മികളില്‍ നിന്ന് സംരക്ഷിക്കുന്നു. ചൂട് കൂടുതല്‍ ഉള്ള സമയത്ത് സണ്‍ഗ്ലാസ് ഉപയോഗിക്കുന്നത് കണ്ണുകളുടെ സംരക്ഷണത്തിനും നല്ലതാണ്.


ടാല്‍കം പൌഡര്‍ ഒഴിവാക്കുക 
മുഖത്ത് ഉപയോഗിക്കുന്ന പൌഡര്‍ മേക്കപ്പിന്റെ അവസാന ഘട്ടമായി ഉപയോഗിക്കുന്നതാണ് . മേക്കപ്പ് ചെയ്തതിനുശേഷം അതിന് പുറത്ത് പുരട്ടുന്ന പാളിയാണ് ടാല്‍കം പൌഡര്‍. എന്നാല്‍ ടാല്‍കം പൌഡര്‍ ഉപേക്ഷിക്കുന്നതാണ് നല്ലത്. മുഖസൌന്ദര്യത്തിന് നാം ഉപയോഗിക്കുന്ന ഇത്തരത്തിലുള്ള പൌഡറിനുപകരം നമ്മുടെ ചര്‍മ്മത്തിനനുസരിച്ചുള്ള മോയിസ്ചറൈസിങ് ക്രീം പുരട്ടുന്നതാണ് നല്ലത്. അതിന് ആദ്യം ചെയ്യേണ്ടത് നമ്മുടെ ചര്‍മ്മം എണ്ണമയമുള്ളതാണോ, വരണ്ടതാണോ എന്ന് കണ്ടുപിടിച്ച് അതിനനുസരിച്ചുള്ള മോയിസ്ചറൈസിംഗ് ക്രീം ഉപയോഗിക്കുകയാണ്.


കണ്ണുകള്‍ക്ക് ഐ ലൈനര്‍ മസ്കാര
മുഖസൌന്ദര്യം പോലെതന്നെ പ്രധാനമാണ് കണ്ണുകളുടെ സൌന്ദര്യവും. കണ്ണുകളുടെ മേക്കപ്പില്‍ പ്രധാനമായും ഉപയോഗിക്കുന്നതാണ്
ഐ ലൈനെര്‍ മസ്കാര. പെട്ടെന്ന് ചെയ്യാവുന്ന ഒരു മേക്കപ്പാണിത്, ഇത് കണ്ണുകളുടെ ഭംഗികൂട്ടുന്നു. മസ്കാരയും ഐ ലൈനറും തിരഞ്ഞെടുക്കുമ്പോള്‍ കൂടുതലായും കറുത്ത നിറമോ,കറുത്ത ബ്രൌണ്‍ നിറമോ തിരഞ്ഞെടുക്കുന്നതാകും നല്ലത്. കറുത്തനിറം കണ്ണുകള്‍ക്ക് കൂടുതല്‍ ആകര്‍ഷണീയത നല്‍കുന്നു.


ലിപ്സ്റിക് തിരഞ്ഞെടുക്കുമ്പോള്‍
ലിപ്സ്റിക് തിരഞ്ഞെടുക്കുമ്പോള്‍ ചില കാര്യങ്ങള്‍ ശ്രദ്ധിക്കേണ്ടതാണ്. തിളങ്ങുന്ന ചുവപ്പ് നിറം, പിങ്ക്, പവിഴ നിറം, മാന്തളിര്‍ നിറം എന്നിങ്ങനെയുള്ള നിറങ്ങള്‍ തിരഞ്ഞെടുക്കുന്നതാകും നല്ലത്. വളരെ ആകര്‍ഷണം തരുന്ന നിറങ്ങളാണ് ഇവ



സൌന്ദര്യവര്‍ദ്ധക വസ്തുക്കള്‍ തിരഞ്ഞെടുക്കുമ്പോള്‍
ത്വക്ക് രോഗ വിഗദ്ധന്റെ ഉപദേശം സ്വീകരിച്ച ശേഷം മാത്രം സൌന്ദര്യവര്‍ദ്ധക വസ്തുക്കള്‍ തിരഞ്ഞെടുക്കുക. നമ്മുടെ ചര്‍മ്മത്തിന് ദോഷകരമായി ബാധിക്കാത്ത വസ്തുക്കള്‍ തിരഞ്ഞെടുക്കുക. മാര്‍ക്കറ്റില്‍ കിട്ടുന്ന ഏതും വാങ്ങി ഉപയോഗിക്കാതിരിക്കുക . മാര്‍ക്കറ്റില്‍ കാണുന്ന വസ്തുക്കളെല്ലാം വാരിവലിച്ച് ഉപയോഗിക്കുന്നതുവഴി മുഖത്ത് പാടുകളും മറ്റും ഉണ്ടാകുന്നു.